ប្រែសម្រួល៖ ស-សម្បត្តិ
នៅពេលដែលទំនាក់ទំនងដ៏តានតឹងរវាងប្រធានាធិបតី Donald Trump និងសមភាគីអ៊ុយក្រែនរបស់លោក Volodymyr Zelensky បានបែកបាក់កាលពីថ្ងៃពុធ សំណួរដែលនៅតែជាប់ក្នុងចិត្តសម្ព័ន្ធមិត្តទាំងសងខាងគឺថាតើជម្លោះនេះនឹងបំផ្លាញក្តីសង្ឃឹមសម្រាប់សន្តិភាពដែលសហរដ្ឋអាមេរិកជាអ្នកសម្របសម្រួល ឬក៏អាចជួយជំរុញវាទៅមុខ។
ដោយបានបង្ហោះសារក្នុងអារម្មណ៍ខឹងសម្បាលើវេទិកាបណ្តាញសង្គមរបស់លោក Trump បានហៅលោក Zelensky ថាជា “ផ្តាច់ការដែលគ្មានការបោះឆ្នោត” ដោយចោទប្រកាន់ថាលោកបានបង្ខំសហរដ្ឋអាមេរិកឱ្យចំណាយប្រាក់រាប់រយពាន់លានដុល្លារ “ដើម្បីចូលរួមសង្គ្រាមមួយដែលមិនអាចឈ្នះបាន។”
វាបានក្លាយទៅជាការជេរប្រមាថពេញមួយថ្ងៃ ដែលលោក Trump បានពង្រីកបន្ថែមក្នុងសុន្ទរកថារបស់លោកនាយប់ថ្ងៃពុធនៅទីក្រុងមីយ៉ាមី ដែលលោកបានប្រកាសថា៖ “លោក Zelensky ត្រូវតែធ្វើចលនាឱ្យលឿនជាងនេះ។ លោកនឹងគ្មានប្រទេសនៅសល់ទេ។”
ការចោទប្រកាន់ទាំងពីរនេះបានធ្វើតាមគំរូការនិយាយរបស់ទីក្រុងមូស្គូអំពីសង្គ្រាមនិងប្រធានាធិបតីអ៊ុយក្រែន ដែលបានប្រកាសច្បាប់អាជ្ញាសឹកនៅពេលចាប់ផ្តើមមានការឈ្លានពានពីរុស្ស៊ី ដែលបានរារាំងការបោះឆ្នោតដែលបានគ្រោងទុក។
ការវាយប្រហាររបស់លោក Trump មិនមែនជាករណីដាច់ដោយឡែកនោះទេ។ អស់រយៈពេលជាច្រើនឆ្នាំ លោក Trump បានមើលលោក Zelensky ដោយការសង្ស័យ ដោយចោទសួរអំពីការសម្រេចចិត្តរបស់លោក និងក្នុងព្រឹត្តិការណ៍មួយដែលល្បីល្បាញក្នុងអំឡុងពេលដំណើរការទម្លាក់ចេញពីតំណែងលើកទីមួយរបស់លោក Trump គឺការស្នើឱ្យលោកបើកការស៊ើបអង្កេតទៅលើគូប្រជែងនាពេលនោះគឺលោក Joe Biden។
លោក Trump បានចាប់ផ្តើមនិយាយរួមបញ្ចូលគ្នានូវការរិះគន់របស់លោកចំពោះលោក Biden និងលោក Zelensky ដោយបានលើកឡើងនាយប់ថ្ងៃពុធថា ប្រធានាធិបតីអ៊ុយក្រែនកំពុងស្ថិតក្នុង “ភាពងាយស្រួល” ជាមួយនឹងជំនួយរបស់សហរដ្ឋអាមេរិកក្នុងអំឡុងរដ្ឋបាលរបស់លោក Biden។
“ប្រសិនបើអ្នកមានរដ្ឋបាល (Biden) មួយឆ្នាំទៀត” លោក Trump បាននិយាយនាយប់ថ្ងៃពុធ “អ្នកនឹងស្ថិតក្នុងសង្គ្រាមលោកលើកទីបី ហើយវានឹងមិនកើតឡើងទេឥឡូវនេះ។”
ទោះយ៉ាងណា ថ្មីៗនេះ ជំនួយការរបស់លោក Trump បានតាមដានយ៉ាងដិតដល់នូវសេចក្តីថ្លែងការណ៍ជាសាធារណៈរបស់លោក Zelensky ជាពិសេសការរិះគន់របស់លោកចំពោះការមិនបញ្ចូលប្រទេសអ៊ុយក្រែនក្នុងការចរចាជាមួយមន្ត្រីរុស្ស៊ីនៅប្រទេសអារ៉ាប៊ីសាអូឌីតនាសប្តាហ៍នេះ ដោយមានការខឹងសម្បាកាន់តែខ្លាំង។
ប្រភពបានឱ្យដឹងថា ការខកចិត្តរបស់ពួកគេបានកើនឡើងមុនថ្ងៃពុធ។ ប៉ុន្តែវាបានផ្ទុះឡើងបន្ទាប់ពីលោក Zelensky បានប្រាប់អ្នកសារព័ត៌មាននៅការិយាល័យរបស់លោកនៅទីក្រុងគីវថា លោក Trump កំពុងរស់នៅក្នុង “បណ្តាញនៃព័ត៌មានមិនពិត។”
មន្ត្រីធ្វើដំណើរជាមួយលោក Trump បាននិយាយថា លោក Trump បានប្រាប់ជំនួយការដែលនៅជាមួយលោកនៅរដ្ឋហ្វ្លូរីដាជាឯកជនថា លោកចង់ឆ្លើយតបដោយផ្ទាល់ ដែលនាំឱ្យមានការបង្ហោះសារនៅលើ Truth Social។ លោកបានផ្ញើសារការទូតនេះក្នុងពេលធ្វើដំណើរទៅក្លិបកូនហ្គោលរបស់លោកនៅទីក្រុងមីយ៉ាមី និងបានពន្យល់បន្ថែមអំពីសម្តីរបស់លោកនៅចំពោះមុខទស្សនិកជនរាប់រយនាក់នៅសន្និសីទវិនិយោគពេលល្ងាចនៅទីក្រុងមីយ៉ាមី ដែលឧបត្ថម្ភដោយមូលនិធិទ្រព្យសម្បត្តិអធិបតេយ្យរបស់អារ៉ាប៊ីសាអូឌីត ដែលបានរៀបចំការចរចារវាងមន្ត្រីសហរដ្ឋអាមេរិកនិងរុស្ស៊ីកាលពីដើមសប្តាហ៍។
“វាជាការខកចិត្តមួយ។ មានអារម្មណ៍ខ្លាំងនិងត្រឹមត្រូវថា សង្គ្រាមឃោរឃៅនេះត្រូវតែបញ្ចប់ ហើយផ្លូវនេះកំពុងត្រូវបានកាត់បន្ថយតាមរយៈសេចក្តីថ្លែងការណ៍ជាសាធារណៈរបស់លោក Zelensky” មន្ត្រីសេតវិមានទីពីរបានប្រាប់ CNN។
ទោះយ៉ាងណា តាមទស្សនៈរបស់លោក Zelensky ការបញ្ចប់សង្គ្រាមដែលលោក Trump កំពុងស្រមៃមើលមានលក្ខណៈស្រដៀងគ្នាទៅនឹងអ្វីដែលរុស្ស៊ីបានស្នើសុំ។ រួចទៅហើយ សមាជិករដ្ឋបាលរបស់លោក Trump បានបដិសេធសមាជិកភាព NATO សម្រាប់ទីក្រុងគីវ និងបាននិយាយថា កងទ័ពសហរដ្ឋអាមេរិកនឹងមិនជួយធានាសន្តិសុខអ៊ុយក្រែននៅពេលសង្គ្រាមបញ្ចប់ទេ។
ដោយហេតុផលទាំងនេះ លោកនិយាយថាលោកមិនអាចមិននិយាយបានទេ។
អស់រយៈពេលជាច្រើនខែ លោក Zelensky បានព្យាយាមយ៉ាងប្រុងប្រយ័ត្នដើម្បីជៀសវាងការបែកបាក់ទាំងស្រុងជាមួយសមភាគីថ្មីដែលមានចរិតប្រែប្រួលរបស់លោកនៅវ៉ាស៊ីនតោន។ លោកបានរៀបចំការជួបប្រជុំក្នុងសប្តាហ៍មុនការបោះឆ្នោតឆ្នាំមុន ដែលមានគោលបំណងបន្ធូរបន្ថយការសង្ស័យមួយចំនួនរបស់បេក្ខជនគណបក្សសាធារណរដ្ឋនាពេលនោះអំពីការចូលរួមរបស់សហរដ្ឋអាមេរិកក្នុងសង្គ្រាម។
បុរសទាំងពីរបានចេញមកនៅដើមការពិភាក្សានៅអគារ Trump Tower នៅម៉ានហាតតាន់ដើម្បីបង្ហាញពីឆន្ទៈរបស់ពួកគេក្នុងការចុះសម្រុងគ្នា។ លោក Trump បាននិយាយថា លោកមាន “ទំនាក់ទំនងល្អណាស់” ជាមួយមេដឹកនាំអ៊ុយក្រែន ប៉ុន្តែលោកក៏មាន “ទំនាក់ទំនងល្អណាស់” ជាមួយគូប្រជែងរបស់លោកនៅទីក្រុងមូស្គូ គឺលោក Vladimir Putin ផងដែរ។
“ខ្ញុំសង្ឃឹមថាយើងនឹងមានទំនាក់ទំនងល្អច្រើនថែមទៀត” លោក Zelensky បានជំទាស់។
“ប៉ុន្តែ អ្នកដឹងទេ វាត្រូវការមនុស្សពីរនាក់ដើម្បីរាំតាងហ្គោ” លោក Trump បានឆ្លើយតប។
នៅពេលនោះ ការផ្លាស់ប្តូរនេះមិនសូវមានការចាប់អារម្មណ៍ទេ។ ប្រាំខែក្រោយមក វាហាក់ដូចជាបានទស្សន៍ទាយអំពីការបែកបាក់គួរឱ្យកត់សម្គាល៕
